На 25 јуни 2009 година почина Мајкл Џексон, американски пејач, текстописец, танчар и продуцент, кој се смета за еден од највлијателните изведувачи во историјата на популарната музика. Имаше 50 години, а во моментот на неговата смрт се подготвуваше за серијата од 50 концерти „This Is It“ во Лондон, кои требаше да го означат неговото враќање на сцената по повеќегодишна пауза.

Џексон кариерата ја започна како член на групата „Џексон 5“, а во текот на осумдесеттите години се етаблираше како најголемата поп-ѕвезда во светот. Албумите „Off the Wall“, „Thriller“, „Bad“ и „Dangerous“ продадоа стотици милиони примероци, додека песни како „Billie Jean“, „Beat It“, „Thriller“, „Black or White“ и „Man in the Mirror“ станаа безвременски хитови.

Покрај музиката, тој остави силен печат и врз развојот на музичките видеозаписи, концертната продукција и современата поп-култура.

Последните денови и истрагата за неговата смрт

Во месеците пред смртта, Џексон интензивно работел на подготовките за концертниот серијал „This Is It“, но истовремено имал сериозни проблеми со несоница. Според магазинот „Пипл“, неговиот личен лекар Конрад Мареј секојдневно го посетувал за да му дава терапија за спиење.

Ноќта пред смртта, Џексон одржал повеќечасовна проба, а следното утро, по уште една непроспиена ноќ, повторно побарал да му биде даден пропофол, анестетик што го користел за да заспие.

Откако ја примил дозата, пејачот престанал да дише. Бил пренесен во Медицинскиот центар „Роналд Реган“ при Универзитетот УКЛА во Лос Анџелес, каде што лекарите го прогласиле за починат во 14:26 часот по локално време. Обдукцијата утврди дека смртта настапила како последица на акутна интоксикација со пропофол, во комбинација со други седативи, а случајот беше класифициран како убиство поради лекарска небрежност.

Неговиот личен лекар Конрад Мареј во 2011 година беше прогласен за виновен за убиство од небрежност. Обвинителството оцени дека пропофолот бил даван во несоодветни услови, без неопходната медицинска опрема и мониторинг, како и дека неоправдано било одложено повикувањето на службите за итна помош.

Неговото наследство продолжува да поставува рекорди

Смртта на Мајкл Џексон предизвика невиден интерес во јавноста. Во првите часови по објавувањето на веста, милиони луѓе истовремено пребаруваа информации, поради што беа преоптоварени неколку од најголемите интернет-платформи, а неговите албуми повторно се најдоа на врвот на светските музички топ-листи.

Меморијалната церемонија, одржана на 7 јули 2009 година во Лос Анџелес, беше следена од милијарди гледачи ширум светот.

И речиси две децении по неговата смрт, Мајкл Џексон и ден-денес е еден од најпродаваните музички изведувачи во историјата. „Thriller“ сè уште е најпродаваниот албум на сите времиња, а неговото влијание врз музиката, танцот и модата продолжува да биде предмет на анализи и инспирација за новите генерации уметници.

Како Мајкл Џексон „воскресна“ во 2026 година и зошто генерацијата Зет е воодушевена од него?