Шпанија и Кина најавија продлабочување на меѓусебните односи и заедничка заложба за зачувување на глобалниот мир и развој, во време кога меѓународниот поредок „се распаѓа“, како што оцени кинескиот претседател Си Џинпинг.  Пораката беше испратена за време на неговата средба со шпанскиот премиер Педро Санчез во Пекинг, на која двете страни ја истакнаа потребата од зајакната соработка во услови на зголемена глобална неизвесност.

Посетата на Санчез доаѓа во време кога многу западни влади се обидуваат да ги одржат врските со Пекинг и покрај долгогодишните безбедносни и трговски тензии, додека расте незадоволството поради политиките на клучниот сојузник, американскиот претседател Доналд Трамп, пишува Ројтерс.

„Денешниот свет е во хаос, а меѓународниот поредок се распаѓа“, рече Си, додавајќи дека подлабоките врски се во интерес и на Кина и на Шпанија.

Тој повика на посилна комуникација и доверба за поддржување на владеењето на правото, заедничка одбрана на вистинскиот мултилатерализам и заштита на глобалниот мир и развој.

Санчез рече дека меѓународното право „постојано се поткопува“ и повика на поблиски врски за промовирање на мирот и просперитетот.

„Ова е потребно денес повеќе од кога било и за да можеме заедно да воспоставиме уште посилна врска меѓу Кина и Европската Унија“, рече Санчез.

Како последен во низата негови колеги од Велика Британија, Канада, Финска и Ирска што ќе ја посетат Кина оваа година, Санчез ја повика втората по големина економија во светот да преземе поголема улога во решавањето на овие прашања. Тие се движат од климатските промени до безбедноста, одбраната и борбата против нееднаквоста, рече тој вчера.

Тој ја повика Европа да ги удвои своите напори бидејќи САД одлучија да се повлечат од многу од тие области. Шпанија е еден од најгласните европски застапници за проширување на трговијата и третирање на Кина како стратешки партнер, а не како економски и геополитички ривал, како што гледа Трамп.