Македонската женска сениорска репрезентација се подготвува за настапот на Европското првенство кое ќе се одржи од 4 до 20 ноември 2022. Овој голем настан ќе се организира во три земји Македонија, Словенија и Црна Гора. Избраничките на селекторот Љубомир Савевски натпреварите од прелиминарната рунда ќе ги играат во Скопје во СЦ „Борис Трајковски“.

Нашата селекција сите три натпревари од групата „Ц“ ќе ги игра од 18.00 часот, најпрвин во првото коло против фаворитот во групата, Франција, потоа на 7 ноември ривал е Холандија, а на 9 ноември селекцијата на Романија. Првопласираните три репрезентации од секоја група ќе се најдат во главната фаза на ЕП.

Со големо внимание ова Европско првенство ќе го следи и поранешната репрезентативка, една од најдобрите во историјата на македонскиот женски ракомет, Индира Кастратовиќ.

Најдобриот пласман Македонија на континенталните собири го имаше во 2008 година (кога само нашата земја беше домаќин), со освојување на седмото место.

– Да направиме нешто на што можеме да се гордееме, еве нека не биде тоа седмо место, нека биде уште подобар пласман. Мислам дека можеме, само треба сите во Македонија да се сплотиме како едно. Сите една репрезентација, сите да работиме за таа цел за една многу убава наша промоција – ни изјави Кастратовиќ.

ВИДЕО: Играме со срце – дојдете и навивајте за македонските ракометарки на Европското првенство