Чувството на глад е една од најчестите причини поради кои многу луѓе се откажуваат од диета и поздрав начин на исхрана. Кога организмот внесува помалку калории од вообичаено, гладот станува поизразен, што може да го отежне одржувањето на дисциплината и поставените цели.

Сепак, постојат едноставни начини што можат да помогнат апетитот полесно да се контролира и диетата да биде полесна за следење. Важно е да се разбере дека гладот не е секогаш ист и може да се појави од различни причини.

Механичкиот глад се јавува кога желудникот е празен, додека емоционалниот или нервозниот глад најчесто е поврзан со стрес, досада или расположение. Постои и метаболички глад, кој може да се појави поради нагли промени на нивото на шеќер во крвта. За време на диета најчесто се јавува механички глад, но одредени навики можат да помогнат тој да се намали.

Црното кафе често се споменува како сојузник при слабеење, бидејќи кофеинот може привремено да го намали апетитот, а воедно да ја зголеми енергијата и концентрацијата, особено пред физичка активност.

Важна улога имаат и протеините, кои подолго го одржуваат чувството на ситост. Поради тоа се препорачува оброците да содржат намирници богати со протеини за да се намали потребата од често грицкање.

Зеленчукот и храната богата со растителни влакна исто така можат да помогнат во контролата на гладот. Овие намирници имаат голем волумен, а малку калории, па создаваат чувство на ситост без прекумерен внес на храна.

Јаболките се уште еден добар избор бидејќи содржат растителни влакна и малку калории, па можат да бидат практична ужина меѓу оброците.

Многумина советуваат и поинаков распоред на оброците. Наместо голем број мали оброци, на некои луѓе повеќе им одговараат три пообилни оброци и една ужина, бидејќи така подолго остануваат сити.

На крајот, најважно е да се одржува калориски дефицит, но на начин што е долгорочно одржлив и поднослив.