Гушењето кај мачките може да се случи од многу причини. Може да се појави кога нешто ќе се заглави во грлото, гркланот или трахеата на мачката, спречувајќи го правилниот проток на воздух. Иако задушувањето е ретко, внимавајте да не дозволите вашата мачка да проголта мал предмет што изгледа како интересна ужина, пишува „Телеграф љубимци“.

Мали делови од играчки, како што се топчиња, пуфки, ѕвончиња, скршени парчиња и други туѓи предмети може да се заглават во грлото на вашата мачка и да предизвикаат задушување. Дури и храната што не е ситно исечкана може да предизвика проблеми за вашата мачка.

Може да се посомневате на задушување ако вашата мачка се однесува на следниве начини: постојано ја трие устата со шепата и се лигави, се гуши или кашла, е вознемирена, има тешкотии со дишењето или не може да дише, губи свест, има лош здив, нема апетит или е летаргична.

Ако вашата мачка е свесна и не е премногу вознемирена, проверете дали има туѓ предмет во устата. Ако има, извадете го или однесете ја вашата мачка кај ветеринар за да го отстрани. Ако мачката е во несвест, не дише или дише многу тешко, отворете ја устата и извлечете го јазикот од устата колку што е можно повеќе. Ако видите туѓо тело, обидете се да го зграпчите со прстит или пинцета. Можете исто така да ја примените постапката на Хајмлих, ако сте обучени за тоа.

Ако забележите конец во устата на мачката, не обидувајте се да го извлечете, бидејќи најверојатно е заглавен длабоко внатре и влечењето ќе ја влоши ситуацијата.

Ветеринарот ќе постави дијагноза врз основа на прегледот на мачката и описот на сопственикот за тоа што предизвикало задушување. Може да бидат потребни рендгенски снимки на главата, вратот и градите на мачката за да се утврди каде се наоѓа туѓото тело.

Отстранувањето на туѓото тело може да биде многу едноставно ако се извади од устата, но може да биде потребна и хируршка интервенција на вратот. Откако ќе се отстрани туѓото тело, закрепнувањето обично е без проблеми. Доколку имало посериозно оштетување предизвикано од туѓо тело или била потребна хируршка интервенција, гркланот на мачката ќе се опорави најдолго. Доколку туѓо тело го оштетило внатрешниот дел од системот за голтање, може да се појават стеснувања што ќе го отежнат дишењето и голтањето.

Доколку мачката е без кислород подолг временски период, ова може да доведе и до проблеми од невролошка природа, до слепило или ментална вкочанетост.

Треба да знаете кои предмети не треба да бидат во близина на мачката, бидејќи тие можат да ги проголтаат и да предизвикаат проблеми. Станува збор за разни мали предмети и играчки кои не се секогаш безопасни. Бидете внимателни при изборот на предмети со кои мачката ќе си игра и осигурајте се дека сите работи што можат да ѝ наштетат или повредат се надвор од нејзиниот дофат.