Јувентус полека го составува тимот за наредната сезона
Две засилувања се завршени, а на добар пат е да се реализира и третиот трансфер.
„Старата дама“ вчера ја заврши работата со второто засилување за наредната сезона, Артур од Барселона. Летната сага на Артур заврши откако Бразилецот се согласи да се пресели во Јувентус каде ќе им двојно поголема плата од таа во Барселона, а Миралем Пјаниќ ќе се пресели во Шпанија.
Челниците на Јувентус во Артур гледаат долгорочно решение во средниот ред, тој добил гаранции од тренерот Маурицио Сари дека ќе биде стандарден член на првиот тим, и во Торино се убедени дека 23-годишниот фудбалер сè уште не го покажал вистинскиот потенцијал.
Претходно во зимскиот преоден рок, Јувентус го купи Македонецот со шведски пасош, Дејан Кулушевски од Удинезе, кој до пандемијата на коронавирусот, играше фантастично, а Сари очекува тој да биде големо засилување за следната сезона.
Третото засилување за Јувентус речиси сигурно ќе биде левиот бек на Челси, Емерсон Палмиери кој би требало да го зазеде местото на Алекс Сандро.
Дилемите на Сари и на управата се кој да биде нов напаѓач, Обамејанг или Милик бидејќи за очекување е Гонзало Игуаин да биде продаден.
Откако ќе биде завршено купувањето на играчи за наредната сезона, Јувентус ќе почне со продажба, а се очекува тимот од Торино да го напуштат Адриен Рабио кој пристигна минатото лето, Матија Де Шиљо најверојатно ќе се пресели во ПСЖ, а се чека понуда и за Сами Кедира кој моментно е повреден.
Исто така нема место и за Пјаца, Перин и Ругани, а сигурно е дека или Даглас Кошта или Бернадески ќе одат во Челси како замена за Палмиери.