Македонската кошаркарска јуниорска репрезентација „Под 18“ претрпе нов пораз овојпат од Унгарија со 70:86, па така нашите надежи ќе се борат за пласман од 13 до 16 позиција на Европското првенство дивизија „Б“ во Матошинос, Португалија.

Уште во раната фаза, противниkot се стекна со солидна предност, на истекот на првата четвртина беше 23:14. Имаа Унгарците и уште повисоки 37:24, но враќањето во игра на Шошкиќ, кој набрзина стигна до двоен број на поени, 12, донесе нешто поефикасна игра на нашата селекција. Се доближивме на негатива од седум поени (32:39).

На паузата Унгарија сепак однесе двоцифрен плус, имаше десет поени вишок, (44:34). Второто полувреме не донесе некои посериозни промени, ниту во играта уште помалку во резултатот. Унгарците ја одбранија, дури и зголемија предноста која ја стекнаа во првото полувреме, и стигнаа до триумф кој ги става во позиција да се борат за повисоки позиции на првенството.

Шошкиќ го заврши овој натпревар со 14 реализирани поени, а Иванов дојде до 10. По овој нов пораз на шампионатот во Португалија, извесно е дека ќе се бориме за пласман, од 13-16 позиција на ЕП.

В сабота нè чека дуел против поразената селекција од мечот Португалија-Естонија, кој стартува од 21.30 часот.