Катастрофалниот старт на сезоната во Премиер лигата ги натера челниците на Манчестер јунајтед да се вратат на трансфер пазарот во потрагата по елитен напаѓач.

Според англиските медиуми, Манчестер јунајтед се вклучи во трката за потписот со играчот на Барселона, Пјер-Емерик Обамејанг.

За репрезентативецот на Габон, најголем интерес покрај Јунајтед, пројавува Челси кој исто така е во потрага по напаѓач откако летово остана без Ромелу Лукаку и Тимо Вернер.

На Барселона итно и се потребни пари за да може да го регистрира засилувањето од Севиља, Жил Кунде кој не настапи во првото коло против Рајо Ваљекано.

Претседателот на Барселона, Жоан Лапорта очекува да инкасира 20 милиони евра од продажбата на Обамејанг, сума која Јунајтед е подготвен да ја плати.
Во првите две кола Манчестер јунајтед доживеа два порази, од Брајтон (1:2) и од Брентфорд (0:4), а притоа забележлива беше лошата игра и слабата реализација на напаѓачите.

Од друга страна, Челси пак бара нов напаѓач по заминувањето на Лукаку и на Вернер, а менаџерот Томас Тухел инсистира на Обамејанг бидејќи имаше одлична соработка со него во Борусија Дортмунд.