Фудбалската А репрезентација на Македонија по ремито со Италија, забележа нов позитивен резултат во квалификациите за ЕП 2024, совладувајќи ја селекцијата на Малта со 2:0 на гостински терен.

Избраниците на селекторот Благоја Милевски од самиот старт на мечот наметнаа своја игра, го притиснаа противникот на својата половина и постигнаа два гола до полувремето, и на тој начин го решија прашањето на победникот, оправдувајќи ја фаворитската улога.

Ова е втора победа на сениорската репрезентација во овие квалификации, а следниот меч ќе го имаат на 14 октомври против Украина, според најавите, во Прага, Чешка.

Нашиот репрезентативец Јани Атанасов беше стартер на дуелот против Малтежаните и настапи до 79 минута кога беше заменет од Агон Елези.

– Уморни сме, но го дадовме максимумот, го дадовме срцето на теренот. Сите заедно како тим делувавме компактно и на крајот заслужено ги освоивме трите бода. Покажавме дека под притисок сме многу здрави, и дека можеме да го носиме притисокот. Без разлика каков е притисокот кога се игра за Македонија даваме сè од себе, и секогаш сме тука за Македонија. Ги исполнивме задачите на селекторот и сега бевме подобри во завршницата од нападите – изјави Атанасов по завршувањето на натпреварот против Малта.