Една од најатрактивните нови македонска музички ѕвезди, Јанг Дади, ќе го одржи својот прв солистички концерт на 12 септември во СЦ Јане Сандански.

Од „Авалон продукција“ најавуваат дека Јанг Дади ќе настапи во живо придружуван од бенд, на продукциски и визуелно збогатен мултимедијален спектакл кој ќе ги спои сите негови најголеми хитови и нова креативна визија.

На сцената ќе му се придружат гости кои биле дел од неговото музичко патување уште од самите почетоци, пријатели и соработници од целиот регион кои низ годините оставиле свој печат во неговата кариера.

– Со својата автентичност, препознатлив стил и серија хитови, Јанг Дади успеа да стане миленик кај публика од сите возрасти, од најмладите, па сѐ до оние кои внимателно ја следат домашната музичка сцена со години. Неговиот хит „Лидија“, кој веќе брои милионски прегледи, се претвори во вистински музички и културен феномен, потврдувајќи го статусот на Јанг Дади како еден од највлијателните и најслушани нови македонски артисти во моментов – велат од Авалон.