Италијанците за Божиќ ги очекува забрана за напуштање на домовите
За време на претстојните празници, од 21 декември до 6 јануари, Италијанците кои се враќаат од европските земји ќе мора да поминат двонеделен карантин. Ова е предвидено со владиниот указ што го потпиша премиерот Џузепе Конте.
Мерката има за цел да спречи увозот на коронавирус во случаи кога Италијанците ги посетуваат скијачките центри во соседните земји, особено во Австрија, Швајцарија и Словенија, каде се планира отворање на зимските капацитети. Сепак, италијанските планински одморалишта нема да бидат отворени до 7 јануари.
За време на празничниот период, на Италијанците ќе им биде забрането да се движат помеѓу различни региони во земјата, а на 25 и 26 декември, односно на Божиќ и на први јануари е забрането напуштање на живеалиштето. Полицискиот час трае од 22.00 до 05.00 часот, а на новогодишната ноќ ќе биде продолжен до 07.00 часот. Сите концертни и спортски сали, како и базените остануваат затворени. За време на празничниот период ќе биде запрен и водниот сообраќај.
Факторот на преносливост на коронавирус за Италија е веќе под единицата и до Божиќ сите региони ќе преминат во „жолтата зона“ на ризик, со умерена епидемиолошка опасност, додаде премиерот Конте. Вчера во Италија беа регистрирани 993 смртни случаи, што е најголем дневен раст од почетокот на пандемијата.
Глоби од 400 до 1.000 евра се изрекуваат за непочитувањето на ограничувањата во земјата.