Истражување: Археолошкиот локалитет Влахо е најстарата неолитска населба во Македонија
Археолошкиот локалитет Влахо кај Живојно во Пелагонија е најстарата неолитска населба во Македонија којашто датира во 64-от век пред новата ера. Основана е дури 300 години пред останатите во овој регион, што воедно ја прави и еден од најраните неолитски локалитети во Европа, информира Центарот за истражување на предисторија.
Влахо е специфичен и по присуството на десетина ровови и објекти, што беше регистрирано со геофизичкото скенирање на неговиот простор. Археолошкото истражување на локалитетот го потврди постоењето на овие ровови, како и богатата стратиграфија сочинета од ранонеолитски слоеви во кои има остатоци од куќи од лепеж, белосликана керамика, фигурини, жртвеници, антропоморфни модели на куќи и алатки. Археоботаничките и археолошките анализи укажуваат на консумирање храна од пченица, јачмен, леќа, грашок, јаболка, капини, говеда, овци, кози и свињи, и тоа уште во самите почетоци на овој особено значаен локалитет, вели д-р Гоце Наумов од Центарот.
Овие откритија, Центарот за истражување ги презентираше и пред меѓународниот собир на Европската асоцијација на археолозите во Будимпешта, како и на предавања во Берлин и Рим. Археолошкиот локалитет Влахо се истражува веќе неколку години во соработка меѓу Центарот за истражување на предисторијата и Завод и музеј – Битола, при што се вклучени и експерти од Универзитетот од Базел, Шпанскиот национален совет за наука, Универзитетот во Белград, Завод и музеј – Прилеп, Институтот за старословенска култура, Археолошкиот музеј на Македонија и студенти од Универзитетот „Св. Кирил и Методиј“ и Универзитетот „Гоце Делчев“.
Истражувањата се поддржани од германската Фондација за истражување и заштита на тумбите, Универзитетот во Базел, македонското Министерство за култура, шпанскиот Национален совет за наука, Фондот Западен Балкан и Европската Унија.