Историски пад на производството во Германија
Индексот на очекувани производни активности потона на минус 51,4 поени.
Германските индустријалци очекуваат историски пад на производството, покажуваат резултатите на анкетата спроведена од Институтот „IFO“ во Минхен. Индексот на очекувани производни активности за наредните три месеци падна на минус 51,4 поени во април од ниво на минус 21,4 во март, се наведува во соопштението на Институтот кое го објави „Танјуг“.
Ова е најниската вредност на овој показател од повторното соединување на Германија. Во екот на глобалната финансиска криза во декември 2008 година, овој индекс изнесуваше минус 42,9 бодови.
– Падот на очекувањата во производството станува се подлабок. Единствено производителите во фармацевтската индустрија чувствуваат оптимизам во поглед на иднината. Нивниот индекс од минус 19,4 бода се искачи на плус 13,8 поени во април, вели Клаус Вохлреб, шеф за истражување во институтот во Минхен.
Кај производителите напроизводи од гума и пластика индексот потона од минус 33 поени во март на минус 55 бодови во април, а во автомобилската индустрија овој индекс падна од минус 36 на минус 42 поени во април.
Песимизмот преовладува и кај германските производители на храна, каде е забележан пад на индексот од плус 3 на минус 17 поени.
Исклучителен пад се очекува да биде регистриран кај индексот на очекувано производство на кокс и нафтени деривати, каде е забележан пад од минус 0,1 на минус 92 поени.
Производителите на мебел, облека, производи од стакло и електрична опрема исто така се исклучително песимисти во поглед на своите очекувања за производни активности во блиска иднина.