САД и Израел започнаа воени напади врз Иран насочени кон неговото раководство, Техеран одговори со контранапади врз американски цели низ целиот Блиски Исток, а двете страни најавуваат дека ова е само почеток на непријателствата. Техеран ги нарече нападите неиспровоцирани и нелегални и одговори со лансирање ракети кон Израел и кон неколку арапски земји сојузници на САД, во кои има американски воени бази.

„По ова, следува употреба на невидено оружје“

Иран најавува уште посилен одговор – командантот на Иранската револуционерна гарда, Ебрахим Џабари, рече дека наскоро ќе следи употреба на досега невидено оружје, објави иранската државна телевизија.

Три извори изјавија дека во израелските напади се убиени иранскиот министер за одбрана Амир Насирзаде и главниот командант на Револуционерната гарда, Мохамед Пакпур.

Првиот бран удари од операцијата, наречен „Епски бес“ од Пентагон, беше главно насочен кон ирански функционери, изјави извор запознаен со ситуацијата. Во меѓувреме, во саботата попладне, беше извршен втор удар насочен кон лансери за ракети во Иран.

Израел и САД го започнаа нападот два дена откако индиректните разговори посредувани од Оман во Женева не успеаја да доведат до напредок во нуклеарната програма на Иран.

Израелски функционер изјави дека целите биле врховниот лидер на Иран, ајатолахот Али Хамнеи, и претседателот Масуд Пезешкијан. Исходот од тие напади сè уште не е познат, но извор запознаен со ситуацијата претходно изјави за Ројтерс дека Хамнеи воопшто не бил во иранската престолнина бидејќи бил префрлен на безбедна локација.

Ирански извор близок до властите откри за Ројтерс дека неколку високи команданти на Револуционерната гарда и политички функционери се убиени. Иранските државни медиуми објавија дека четириесет лица биле убиени во израелски воздушен напад врз основно училиште за девојчиња во јужен Иран, а израелската војска сè уште не одговорила на барањето за коментар за обвинувањата. Трамп продолжува да се заканува
Во видео порака објавена на социјалните медиуми, Трамп се осврна на деценискиот спор на Вашингтон со Иран, вклучително и заземањето на амбасадата на САД во Техеран во 1979 година, кога 52 Американци биле држени во заробеништво 444 дена.