ИПА фондови: Најмногу европски пари отишле за проектите од областа на транспортот
Од вкупните над 800 милиони евра 65,8 отсто се за проекти на национално ниво, а 34,2 отсто за општински проекти, при најбројни се проектите од областа на образование, вработување и социјална политика, но најмногу европски пари се дадени за проектите од областа на транспортот
Вардарскиот регион е лидер по инвестирани европски средства во земјава и во него, во периодот од 2007 година досега се слеале 122.851.824,22 евра од вкупно 812.457.807,62 евра инвестирани во земјава преку ИПА фондовите на Европската Унија.
Втор по искористеност на европските фондови е Пелагонискиот регион со вкупно 79.163.058,15 евра, а по него следуваат Скопскиот регион со 44.959.852,53 евра, Југоисточниот регион со 42.353.627,60 евра и Источниот кој има 37.079.873,71 евра. Според податоците што ги објави вицепремиерот за европски прашања Бојан Маричиќ, во Североисточниот регион се инвестирани 34.418.739,01 евра, во Југозападниот регион 31.171.375,34 и во Полошкиот регион 29.044.517,85 евра.
Податоците објавени од Европската Унија покажуваат дека од вкупните над 800 милиони евра 65,8 отсто се за проекти на национално ниво, а 34,2 отсто за општински проекти. Генерално најбројни се проектите од областа на образование, вработување и социјална политика, но најмногу европски пари се дадени за проектите од областа на транспортот. За 933 проекти за образование, вработување и социјална политика преку ИПА се добиени над 97 милиони евра, додека над 220 милиони евра се дадени за 54 проекти од областа на транспортот.
Вкупно на национално и општинско ниво, за демократија и владеење за 332 проекти се добиени над 120 милиони евра, за владеење на правото и фундаментални права имало 104 проекти вредни 85 милиони евра, за 163 проекти од областа на конкурентноста и иновациите ЕУ ни дала 102 милиони евра, за 188 проекти за земјоделство и рурален развој од ИПА се добиени 60 милиони евра, а за екологија и климатска акција имало 122 милиони евра за 92 проекти.
Европската статистика покажува дека најмногу проекти имало во скопскиот регион – 515 за кои ЕУ дала 45 милиони евра. Североисточниот регион за 179 проекти добил 34 милиони евра, Источниот регион имал 133 проекти за 37 милиони евра, а пелагонискиот со 79 милиони евра европски пари „покрил“ 263 проекти. Југозападниот регион за 129 проекти добил 31 милион евра и, како и во сите други региони најголем дел од проектите се од областа на образованието, а само еден за владеење на правото и фундаменталните права.
Вкупно 29 милиони евра се префрлени во Полошкиот регион за 185 проекти, но ниту еден од областа на транспортот, додека во Југоисточниот регион се слеале 4 милиони евра за 113 проекти. Лидер по добиени пари е Вардарскиот регион – 122 милиони евра за 132 проекти.
За вицепремиерот Маричиќ, помошта преку ИПА фондовите значи дека со тоа „граѓаните на земјите членки на ЕУ покажуваат за степенот на свест и желба за придонес кон земјите кандидати за влез во Европската Унија.
-Одговорноста и детерминираноста кои што ги покажуваат нашите европски стратешки партнери треба да се сфатат сериозно. Преземањето одговорност од наша страна е и еден од најважните чекори за успешна реализација на евроинтегративниот процес, а тој се реализира преку свесно превземање на обврските и фокусирана работа од наша страна – објави Маричиќ.
Тој потсетува дека фондовите и средствата кои се инвестирани во Македонија доаѓаат од сите земји членки на ЕУ, пари кои се влеваат во фондовите директно од плаќањето на даноците во Унијата.