Италијанскиот шампион мора да ја засили екипата доколку сака успех во Лигата на шампионите.

Еден од најдобрите играчи на Интер минатата сезона, Ашраф Хакими за сума од 60 милиони евра, плус дополнителни бонуси од 11 милиони, потпиша за францускиот ПСЖ како дел од планот на „неразурите“ да ги испеглаат финансиите.
Одлуката на управата на Интер беше болна но неопходна, а при преговорите со Симоне Инзаги кој го наследи Антонио Конте на клупата, му беше кажано дека дел од играчите ќе мора да си заминат за да може да се финансираат нови засилувања.

За очекување е да не дојдат големи ѕвезди, а тренерот Инзаги веќе има список на желби.
Прва мета на Интер е фудбалерот на ПСВ, Дензел Дамфрис кој беше од најдобрите играчи на Холандија на ЕП, но проблем претставува сумата која ја бараат Холанѓаните. ПСВ нема намера да го пушти Дамфрис за помалку од 20 милиони евра, поради што во Интер размислуваат за Ектор Белерин од Арсенал.
Инзаги сака во Интер да го донесе Лазари од Лацио, но тука проблем е првиот човек на „лацијалите“, Клаудио Лотито кој е гневен поради тоа што Интер му го „украде“ тренерот. Лотито за Лазари бара 25 милиони евра.
Како решение во нападот и тоа како замена за Лукаку, Лаутаро и Санчез, се споменува Балде Кеита кој најдобриот фудбал го играше кога тренер му беше токму Симоне Инзаги.