Австралиската инфлуенсерка Луиз Старки, која живее во Дубаи, се најде на удар на остри критики откако на Инстаграм објави снимка настаната во моментот додека иранските ракети биле пресретнати од противоздушната одбрана на Обединетите Арапски Емирати. Во меѓувреме, видеото исчезнало бидејќи било објавено на инстаграм-приказна, но нејзината изјава се проширила низ социјалните мрежи.

На снимката се гледа Старки во бел фустан како стои на балконот и го гледа небото над Дубаи, додека во далечината се гледаат блесоци и проектили кои прелетуваат над облакодерите.

– Преплашена сум. Навистина сум преплашена – рекла таа на почетокот на видеото, пренесува news.com.au.

Потоа ја свртела камерата кон панорамата на градот и небото над него.

– Ова не смее да се случува тука – додала таа, а потоа прашала: „Зарем сите не можат едноставно да се смират?“

Таа исто така нагласила дека нејзината најголема загриженост е безбедноста на другите.

– Не сакам никој да биде повреден, знаете на што мислам?

Во дополнителен објава опишала како ја доживеала целата ситуација.

– Цел ден слушам гласни експлозии во позадина… звукот е како да се тресат прозорците. Не знам како да го опишам тоа. Тоа е најчудниот звук некогаш. Ова не е забавно, луѓе. Треба да бидеме на најбезбедното место. Ги сакам ОАЕ, сакам да бидам тука. Секогаш се чувствувам толку безбедно, а сега го гледам ова. Ве молам, само престанете – напишала таа.

Нејзините зборови предизвикаа лавина од коментари, а особено одекна изјавата дека „ова не смее да се случува тука“.

– „Ова смее да се случува тука“ мора да е една од најсебичните изјави што некогаш сум ги слушнал. Како да треба да се случува некаде на друго место. Но, дали сум изненаден? Навистина, навистина не сум – напишал еден корисник на социјалните мрежи.

– Така е. Се случува во Газа, тоа е во ред. Но, ако го загрозува вашиот луксузен животен стил, тогаш „тоа не смее да се случува“ – додал друг.

Имало и такви што повикале на смиреност.

– Веруваме во нашето лидерство и оваа фаза ќе помине. Да избегнуваме споделување видеа што шират страв или паника – порачал еден коментатор.

Сепак, некои следбеници ѝ понудиле поддршка за Старки.

– Луди сцени денеска што никогаш не би ги замислиле – напишал еден корисник.

– Наскоро ќе заврши. И јас сум во Дубаи и ги гледам цел ден, но цврсто верувам дека оваа земја е земја на мирот и дека нема да биде повредена. Ова е само привремено нарушување што наскоро ќе заврши. Остани силна – ѝ порачал друг.

– Држи се. Не е лесно за никого. Но, грижи се за тоа што можеш да контролираш, а тоа е твојот начин на размислување – додал трет.

Во меѓувреме, на удар на критики се најде и една британска патничка поради нејзините објави на социјалната мрежа Тикток (кои сега се избришани) додека чекала лет на аеродромот во Дубаи.

Корисничка по име elliesketched го снимила персоналот на аеродромот како го истоварува багажот од авионот, па се пожалила на ситуацијата.

– Претпоставувам дека ќе мора да се пријавиме во некој хотел. Навистина е иритантно, затоа што имаме договорено настани – рекла таа во видеото.

Во други објави, таа го изразила своето разочарување затоа што не можела да влезе во салонот на авиокомпанијата, а чекањето информации од персоналот го нарекла „изгубен ден“.

Реакциите не изостанале.

„Ова е толку несоодветно – луѓе умираат“, напишал еден корисник. „Не можам да верувам дека го објави ова“, додал друг, додека трет прашал: „Дали е ова шега?“

Одговарајќи на критиките, британската туристка појаснила дека во времето на објавувањето не била свесна за сериозноста на ситуацијата.