Претседателот на Меѓународната фудбалска федерација, ФИФА, Џани Инфантино, го оцени Светското првенство 2026 во САД, Канада и Мексико како успешно, велејќи дека турнирот ја исполнил својата мисија да ги зближи луѓето од сите страни на светот.

Инфантино зборуваше на сесијата на Обединетите нации за тоа како фудбалот може да биде катализатор за менталното здравје на младите. Тој донесе на сцената една од официјалните топки што ќе се користат во финалето помеѓу Аргентина и Шпанија во недела, нарекувајќи ја „магичен предмет што има моќ да го обедини светот“, објави Асошиејтед Прес.

– Многу пати слушаме дека живееме во поделен свет, дека живееме во агресивен свет, дека има толку многу работи што нè делат, што ни предизвикуваат проблеми. Но, исто така знаеме дека ако има едно нешто што ни го покажа ова Светско првенство, тоа е дека има многу повеќе работи што нè обединуваат отколку што има работи што нè делат. Во последниот месец и половина, видовме милиони луѓе како се собираат во Соединетите Американски Држави, Канада и Мексико, но луѓето се собираат низ целиот свет на мирен, радосен начин, сакајќи да поминуваат време заедно. Ова е најсилната порака досега и ова е пораката врз која мора да ја градиме нашата иднина – иднина на заедница и единство – рече Инфантино.

Тој вети во ОН дека тој и ФИФА ќе „ја дадат нашата целосна поддршка“ на каузите поврзани со менталното здравје на младите луѓе, велејќи дека темата мора да се сфати сериозно.

Инфантино ги посочи фудбалските натпревари како примери за тоа како спортот може да биде мост преку јазичните, културните, политичките и другите бариери.