Имери, Радески и Стоилов не се повеќе дел од Шкупи
Македонскиот фудбалски шампион ја информираше јавноста дека се прекинува соработката со тројца играчи кои досега ги бранеа боите на клубот од Чаир.
Марјан Радески, Ѓорѓи Стоилов и Омар Имери одлучија ова лето да ја напуштат екипата на Шкупи.
Албанскиот играч од средниот ред Имери после шестмесечната позајмица се враќа во Турција во тимот на Бодрумспор.
Претходно Шкупи се раздели уште со шест фудбалери: Константин Чешмеџиев, Ардит Илјази, Фатих Исмаили, Александар Ѓурковски, Марко Ѓорѓиевски и Абдул Рватубјаје.
Играчите предводени од тренерот Гоце Седлоски ги започнаа подготовките за новата натпреварувачка сезона. Веќе одиграа и неколку пријателски натпревари, беа поразени од косовскиот Балкани (0:2), со истиот резултат загубија и од албанската Тирана, а ремизираа 2:2 со турскиот Фенербахче. Новата контролка е закажана за 25 јуни против Германштадт од Романија.
Во меѓувреме чаирчани го дознаа противникот во првото квалификациско коло од Лигата на шампионите, тоа е Линколн Ред Импс. Првиот дуел ќе се игра во Скопје на 5 јули, а реваншот е седум дена подоцна во Гибралтар. Победникот од овој двомеч, во второто квалификациско коло ќе ги одмери силите против хрватскиот првак Динамо Загреб.