Поранешниот албански претседател и лидер на опозициската, Партија на слободата, Илир Мета останува во затворски притвор откако денеска и Специјалниот апелациски суд го отфрли барањето за изрекување поблаги мерки.

Мета не беше присутен на рочиштето, но беше застапуван од неговиот адвокат Кујтим Чакрани. На рочиштето двајцата специјални обвинители, Арбен Краја и Сотир Клапи, побараа продолжување на веќе изречената мерка на Мета, кој е во притвор од февруари оваа година, што беше и прифатено.

Ова не е првпат Мета да бара поблаги мерки, но сите судски инстанци, вклучително и Врховниот суд, ги отфрлија барањата. Тој поднесе жалба и до Уставниот суд за поблага мерка за безбедност и наводите за прекршувања на законот во процесот против него, за што се очекува датум за разгледување.

Мета (56), претседател на Албанија беше во период од 2017 до 2022 година, на која дојде од функцијата претседател на парламентот. Претходно беше и министер за економија и надворешни работи.

Под истрага на Специјалното обвинителство против корупција и организиран криминал, СПАК, е за корупција, перење пари и прикривање на имот поврзан со досиејата на ЦЕЗ-ДИА, партиско лобирање во САД и семејни трошоци надвор од земјата.

По одлуката на судот Мета веднаш реагираше на Фејсбук, каде напиша „Никакво разочарување од теленовелата – режимска правда”.