Холандскиот производител на пиво „Хајнекен“ ќе отпушти до 6.000 вработени во следните две години, што претставува околу 7 проценти од глобалната работна сила на компанијата, како одговор на намалената побарувачка за пиво. Иако количината на продадено пиво минатата година се намали за 1,2 проценти во споредба со 2024 година, нето-приходот на компанијата се зголеми за 1,6 проценти и достигна 28,9 милијарди евра. Растот на приходите беше поттикнат од добрите резултати на пазарите во развој како што се Нигерија, Етиопија, Виетнам и Индија.

Од друга страна, вкупниот пад на продажбата беше под влијание на послабите резултати во Европа и Америка, каде што беше забележано намалување на обемот на продажба од 3,4 и 2,8 проценти, соодветно – пишува Индекс.хр. „Хајнекен“ објави раст на профитот од 4,4 проценти, што беше над очекувањата, но во исто време ги намали своите прогнози за оваа година. Компанијата сега очекува профитот да порасне помеѓу 2 и 6 проценти во 2026 година, додека претходната прогноза беше во опсег од 4 до 8 проценти.

„Нашиот главен приоритет е да го забрзаме растот, кој ќе го финансираме преку зголемена продуктивност и промени во оперативниот модел“, рече главниот извршен директор Долф ван ден Бринк. „Тоа ќе ни овозможи подобра продуктивност на вработените, поголема брзина и ефикасност.“

Компанијата, исто така, минатиот месец објави дека Долф ван ден Бринк се повлекува од функцијата извршен директор по речиси шест години на таа позиција. Неговиот наследник сè уште не е именуван.