Гватемала ќе им додели азил на никарагванските мигранти депортирани од САД доколку не сакаат да се вратат дома од политички причини, објави во петок претседателот на централноамериканската земја, Бернардо Аревало.

Според договорот потпишан со САД во февруари за време на посетата на американскиот државен секретар Марко Рубио, Гватемала прифаќа мигранти депортирани од администрацијата на Трамп, вклучувајќи и државјани на трети земји.

„Во случај Никарагванците да сакаат да останат во Гватемала, бидејќи не можат да се вратат во својата земја на потекло поради моменталната политичка ситуација, ќе им биде доделен азил“, увери гватемалскиот социјалдемократски претседател за време на прес-конференција.

Мерката е „израз на солидарност со народот на Никарагва“, додаде Аревало.

Hoy fue viernes de #LaRondaGt. ¿Te la perdiste? Acá te cuento… pic.twitter.com/5wBSD7zXdV

— Bernardo Arévalo (@BArevalodeLeon) June 27, 2025

Стотици илјади Никарагванци се протерани, главно во Костарика, САД и Шпанија, откако избувна опозициското востание во 2018 година, во кое загинаа повеќе од 300 луѓе, според бројките на ОН.

Никарагванскиот претседател Даниел Ортега (79), поранешен водач на бунтовниците, е на власт од 2007 година. Тој е остро критикуван од многумина, кои го обвинуваат за наметнување „семејна диктатура“ со неговата сопруга и сега копретседателка Росарио Муриљо.

По ревизијата на Уставот што стапи на сила во февруари, двојката сега ги контролира практично сите овластувања на државата.