Групата „Килерс“ на мета на критики: Пејачот повикал руски фан на сцена за време на концертот во Грузија
Американската рок-група „Килерс“ денеска упати јавно извинување откако нејзиниот фронтмен Брендон Флауерс покани руски фан на сцената за време на нивниот концерт во Грузија.
За време на настапот, Флауерс поканил обожавател од публиката да свири на тапани при изведбата на песната „For Reasons Unknown“, што е веќе традиционална практика на групата, јавува „Би-би-си“.
Пејачот ѝ порачал на публиката да се однесува кон тапанарот како кон свој „брат“, што било придружено со свирежи од дел од публиката, а некои дури и го напуштиле концертот.
„Добри луѓе од Грузија, никогаш не ни беше намера да навредиме некого. Разбираме дека коментарот, кој требаше да сугерира дека сите луѓе во публиката и обожаватели на ‘Килерс’ се ‘браќа и сестри’, може да биде погрешно протолкуван“, се вели во соопштението на рок-групата.
— The Killers (@thekillers) August 15, 2023
Грузија стекна независност од Русија во 1991 година и има долга историја на затегнати односи со Москва.
Во август 2008 година, Русија ја нападна Грузија и дел од оваа поранешна советска република сè уште е под руска контрола.