Грција од 1 јули ќе биде подготвена да прими странски туристи

Плажа Лагониси, Грција / EPA-EFE/YANNIS KOLESIDIS

Државниот министер на Грција Јоргос Герапетритис во интервју за грчката телевизија „ЕРТ” рече дека сѐ уште се во фаза на подготвување на планот за туризмот.

За месец и половина, односно на 1 јули, според изјавите на грчкиот премиер Кирјакос Мицотакис и државниот министер Јоргос Герапетритис, Грција ќе биде подготвена да прими странски туристи, секако доколку сѐ оди според планот, јави дописничката на МИА од Атина.

Мицотакис беше почесен гостин и централен говорник на глобалниот состанокот на меѓународната компанија за консалтинг „Boston Consulting Group”, а во обраќањето преку видеоконференција се задржа и на туризмот и претстојната сезона.

– Ако работите одат според нашиот план, ќе бидеме отворени од 1 јули, со протокол што ќе биде логичен, не само за луѓето кои сакаат да патуваат, туку и за нашата туристичка индустрија. Сакаме голем дел од пазарот од една помала пита. Европската туристичка пита ќе биде многу помала, но ова лето сакаме еден поголем дел – рече Мицотакис.

Плажа „Портокали“ , Ситонија, Халкидики / Фото: EPA-EFE/ERDEM SAHIN

Државниот министер на Грција Јоргос Герапетритис во интервју за грчката телевизија „ЕРТ” рече дека сѐ уште се во фаза на подготвување на планот за туризмот

– Нашата проценка е дека од 1 јули навистина ќе бидеме во позиција да примиме странски посетители, под услови што ќе го гарантираат јавното здравје – рече Герапетритис.

Тој додаде дека за туристите ќе постојат неопходните протоколи, кои ќе бидат балансирана мешавина од заштита на јавното здравје, без при тоа да се поставуваат пречки за туризмот.

Герапетритис коментираше дека ако земјата од која потекнува туристот, побара по враќањето да биде во карантин или да направи нов тест, се создаваат сериозни пречки и тоа е дестимулирачки за туризмот.

Портпаролот на грчката Влада Стелиос Пецас, говорејќи за телевиијата „МЕГА” рече дека „билатералните договори оваа година ќе бидат дел од решението за туризмот”.

Утре почнува сезоната во Грција: Се отвораат 515 плажи, за непочитување на мерките казни до 20.000 евра

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот