Грција ја отфрли можноста за продолжување на рокот за замена на македонските пасоши
Грчкиот министер за надворешни работи Јоргос Герапетритис јасно порача дека нема можност за измена на Преспанскиот договор со цел пролонгирање на рокот на важење на македонските патни исправи по 12 февруари.
– Договорот од Преспа е меѓународен договор, има сила над сите законски одредби и не може еднострано да се менува од никоја од двете страни, порача Герапетритис, и во синоќешното интервју за грчката телевизија „Антена“ и денеска од Парламентот, одговарајќи на пратеничко прашање, јави МИА од Атина.
Шефот на грчката дипломатија кажа дека Нова демократија навремено излезе со ставови за Договорот од Преспа за точките кои тие ги сметале за проблематични, но додаде дека сега не може да се модифицира, а Грција го следи доследното и строго почитување.
– Континуирано имам истакнато дека Договорот од Преспа претставува меѓународен договор. Беше изгласан од грчкиот Парламент и како што налага Уставот, овој Договор има сила над секоја друга законска одредба, што значи дека не може еднострано да се смени од која било од страните. Нова демократија навремено ги изнесе позициите во однос на оние точки кои беа проблематични во Договорот од Преспа. Навремено посочи дека ќе постојат прашања и во имплементирањето. Денес сме уставно обврзани да го спроведуваме овој Договор и не е можно еднострано менување. Но, она што мора да го правиме и го прави Грција е да го следи доследното и строго почитување, рече Герапетритис, одговарајќи на пратеничко прашање.
Во однос на обврската за промена на пасошите и регистарските таблици на возилата до 12 февруари, шефот на грчката дипломатија посочи дека постојат јасни одредби и временски рокови кои мора да се почитуваат.
Притоа додаде дека Министерството за надворешни работи ќе биде строго во однос на предвиденото од Договорот од Преспа и Грција ќе инсистира на верно почитување на обврските кои произлегуваат.
За трите меморандуми со Македонија кои сè уште не се донесени за ратификација во грчкиот Парламентот, Герапетритис рече дека „апсолутно зависат од верното и строго почитување на одредбите на Договорот од Преспа“.
ВМРО-ДПМНЕ пред две недели поднесе иницијатива до Уставниот суд за процена на законите за патните исправи и за безбедност на сообраќајот од 2021 година и времена мерка пасошите и возачките дозволи да важат и по 12 февруари.