Макри, петтиот по големина остров во архипелагот Ехинади во Јонското Море, повторно привлече внимание откако беше ставен на продажба по цена пониска од просечен стан во Лондон. Иако на прв поглед звучи како идеална можност за купување приватен остров, зад ниската цена се кријат сериозни правни, финансиски и инфраструктурни проблеми, пишува „Тајм аут“.

Островот е опкружен со кристално чисто море и има брег со многу заливи и недопрена природа, далеку од масовниот туризам што ги зафати многу грчки летувалишта. Кога првпат се појавил на пазарот на луксузни недвижности во 2022 година, неговата вредност била проценета на околу осум милиони евра. Денес, пак, се продава на аукција за само 247.000 евра.

 

View this post on Instagram

 

A post shared by Greek Reporter (@greekreporter)

Причината за драстичниот пад на цената не е поврзана со локацијата или природните убавини, туку со сложени правни ограничувања. Според документацијата, Макри погрешно бил класифициран како приватна шума, што значително ги ограничува можностите за градба и развој. Дополнително, островот се наоѓа во зона под посебна заштита на природата, поради што практично се блокирани плановите за изградба на луксузни хотели и туристички комплекси, кои претходно биле сметани за негов најголем потенцијал.

Ситуацијата уште повеќе ја усложнува фактот што островот е дел од европската еколошка мрежа „Натура 2000“. Токму поради тие правила, Грција во последните години воведе ограничувања и на одредени плажи, вклучително и забрани за поставување голем број лежалки и туристички содржини. Тоа значи дека секој иден сопственик кој би сакал посериозна изградба би морал да добие посебно одобрение од државата преку претседателски декрет, што претставува долг и сложен административен процес.

Сепак, најголемиот проблем се огромните долгови што доаѓаат заедно со островот. Според информации објавени од порталот „Софоклеус 10“, финансиските побарувања и даночните долгови поврзани со Макри достигнуваат најмалку 20 милиони евра.

Покрај тоа, островот речиси и да нема инфраструктура. Нема уредени системи за струја, вода и управување со отпад, што значи дека новиот сопственик би морал самостојно да го организира и финансира целокупниот развој.

Во моментов, Макри главно може да се користи за земјоделство или како приватно засолниште за луѓе кои бараат целосен мир и изолација.

И покрај сите проблеми, идејата за приватен остров среде Јонското Море за многумина и понатаму звучи привлечно. За некого со доволно пари, трпение и подготвеност да се соочи со сложената бирократија, Макри би можел да претставува навистина необична инвестиција.