Новогодишните и Божиќните празници се најубавиот дел од годината, време кога градот блеска, а домовите стануваат места исполнети со топлина, радост и празнична магија. Поради тоа, Град Скопје ја организира манифестацијата „Украсуваме по скопски“, со која сака да ги мотивира и поттикне скопјани да ги украсат своите домови и да придонесат кон создавањето празнична атмосфера низ целиот град.

Сите заинтересирани граѓани кои сакаат да учествуваат и да се натпреваруваат за најкреативно и највпечатливо новогодишно украсување, може да се пријават на телефонскиот број: 3297 265, секој работен ден од 9 до 16 часот, во периодот до 23 декември 2025 година.

Фотографиите од украсените домови или дворови, заедно со податоците за сопственикот, контакт-телефон и адреса, може да се испраќаат и на e-адресата
[email protected] или по пошта, на адреса булевар Илинден бр. 82, со назнака за манифестацијата „Украсуваме по скопски“.

Град Скопје и годинава ќе ги избере најдобрите во следните категории:

– Најубаво новогодишно украсен двор од индивидуална станбена куќа
– Најубаво новогодишно украсена тераса од стан
– Најубави раскази од средношколците на тема новогодишни желби и празнувања

Пријавените објекти ќе ги посети жири-комисија составена од претставници на медиумите, кои ќе ги оценуваат и писмените творби на средношколците.

За најуспешните учесници во сите категории Град Скопје ќе обезбеди награди, а доделувањето на наградите ќе се одржи на крајот од декември 2025 година.