Српскиот тенисер Новак Ѓоковиќ официјално го најави своето враќање на престижниот турнир во Индијан Велс, со кој традиционално започнува Мастерс-серијата во новата сезона. Организаторите преку социјалните мрежи потсетија дека тој повторно доаѓа во „тенискиот рај“, две децении по своето прво појавување на оваа сцена.

По напорниот настап на Австралија опен и одлуката да го прескокне турнирот во Доха со цел да се одмори и да ја врати формата, Ѓоковиќ е подготвен за нов предизвик во калифорниската пустина.

Србинот досега пет пати го освојувал овој турнир, последен пат во 2016 година, а моментално го дели рекордот со Роџер Федерер. Новото издание во 2026 година за него претставува можност не само за важни поени, туку и за нова страница во историјата на турнирот, кој често се нарекува „петтиот Гренд слем“.

Сепак, патот до трофејот нема да биде нималку лесен. Конкуренцијата е силна, а млади ѕвезди како Карлос Алкараз, кој веќе има две титули, и Јаник Синер се решени да не му отстапат простор. И покрај тоа, Ѓоковиќ покажа во Мелбурн дека и на 39 години може рамноправно да се носи со најдобрите, а свежината што ќе ја донесе во САД би можела да биде клучна.

Да потсетиме, минатата сезона Србинот беше елиминиран уште во првото коло, откако неочекувано загуби од Холанѓанецот Ботик ван де Зандшулп. Овојпат, целта е јасна – поправка на впечатокот и нов напад на историјата во Индијан Велс.