Гитара што ја користел Дејвид Гилмор на шест албуми на „Пинк флојд“ е продадена за рекордни 14,6 милиони долари, што ја прави најскапата гитара некогаш продадена, соопшти аукциската куќа „Кристи“, пишува Би-би-си.

Гилмор свирел на „Фендер Стратокастер“ од 1969 година, со прекар „Црн Страт“, на сите албуми на британскиот рок бенд помеѓу 1970 и 1983 година, вклучувајќи ги „The Dark Side of the Moon“, „Wish You Were Here“ и „The Wall“.

Гитарата била продадена на неименуван купувач по 21 минута лицитирање, како дел од аукцијата за рок сувенири во Њујорк во четвртокот.

Пијано во сопственост на Џон Ленон од „Битлси“, исто така, е продадено на аукцијата за 3,2 долари, што се верува дека е највисоката цена платена некогаш за сувенири на Битлси.

На аукцијата во живо беа претставени предмети од колекцијата на милијардерот американски бизнисмен Џим Ирсеј, кој почина во 2025 година.

Жулиен Праделс, претседател на „Кристи Америка“, рече: „Се чувствувавме како да создаваме историја. Продажбата на Ирсеј му оддаде правда на брилијантноста на колекционерот и на монументалните парчиња што ги собра, иконски предмети што ја раскажуваат приказната за нашата култура и нашето време.“

Продажбата на гитара на Гилмор го надмина претходниот рекордер, ретро акустично-електричен „Мартин Д-18E“ од 1959 година, свирен од Кобејн за време на легендарниот настап на „Нирвана“ на „МТВ анплагд“ во 1993 година, само пет месеци пред неговата смрт. Се продаде за 6 милиони долари (4,5 милиони фунти) во 2020 година.

На аукцијата во четврток беше продадена уште една гитара на Курт Кобејн, од музичкото видео за „Smells Like Teen Spirit“, за 6,9 милиони долари (5,3 милиони фунти).