Германскиот министер за внатрешни работи Александар Добриндт бара директни разговори со исламистичкиот талибански режим во Авганистан со цел да се олесни депортацијата на авганистанските криминалци од Германија, објави списанието „Фокус“.

„Сè уште ни се потребни трети страни за да водиме разговори со Авганистан. Но, ова не може да биде трајно решение“, изјави за „Фокус“ ​​конзервативниот министер, кој е член на Христијанско-социјалната унија (ЦСУ), сестринската партија на Христијанските демократи (ЦДУ) во Баварија.

„Предвидувам постигнување директни договори со Авганистан за олеснување на депортациите“, додаде Добриндт.

Од 2021 година, кога Талибанците ја презедоа власта во Авганистан, немало депортации на Авганистанци од Германија, со само еден исклучок. Минатиот август, 28 Авганистанци осудени за злосторства беа префрлени со авион во Кабул со помош на Катар.

Добриндт, исто така, се осврна на тешкотиите при депортирањето на Сиријците во нивната земја. За да ги олесни депортациите во Сирија, неговата претходничка Ненси Фезер почна да има контакти со новата преодна влада на земјата, која во голема мера доаѓа од исламистичката организација Хајат Тахрир ал-Шам, која го собори сирискиот претседател Башар ал-Асад.

„Постојат контакти со Сирија во врска со договор за депортација на сириски криминалци. Сепак, тие сè уште не дале резултати“, објасни германскиот министер.

Според Добрид, годишниот број на бегалци примени во Германија треба да биде значително помал од 200.000. Оваа граница претходно ја предложи претходникот на Фезер, Хорст Зехофер.

Сепак, во изминатите две години, во Германија беа примени 600.000 баратели на азил, покрај 1,2 милиони Украинци што живеат во земјата, кои треба да се сметаат во вкупниот број бегалци, истакна германскиот министер за внатрешни работи.

„Значи, денес теоретската граница од 200.000 не се применува, таа е исто така превисока врз основа на моменталната ситуација“, нагласи тој.