Додека некои европски земји веќе испраќаат или размислуваат да испратат оружје и војска во Украина, Германија има намера да „помогне“ со 5.000 шлемови за војниците, а градоначалникот на Киев, Виталиј Кличко, прашува „како Германија дополнително ќе го поддржи украинскиот народ – со перници? .

Германската министерка за одбрана Кристин Ламбрехт по седницата на Комисијата за одбрана на Бундестагот изјави дека тоа е јасен сигнал и порака: „Ние сме со вас“.

Таа го поздрави продолжувањето на разговорите за решавање на украинскиот конфликт.

„Ние работиме на мирен начин да го решиме овој конфликт во Европа“, рече Ламбрехт.

Украина постојано бараше помош со оружје од европските земји, вклучително и Германија, за да се одбрани од евентуален напад на Русија, но таа помош беше одбиена од официјален Берлин.

Украинската влада на 19 јануари преку писмо до германското Министерство за одбрана побара помош околу опремата и меѓу другото ја навела потребата од шлемови и заштитни елеци.

Кличко, сепак, изрази недоразбирање поради однесувањето на Берлин, пишува британски Телеграф.

– Немам зборови за однесувањето на германската влада – изјави тој за весникот „Билд“ и додаде: – Министерот за одбрана очигледно не разбрал дека имаме работа со добро опремена руска армија, која може да започне натамошна инвазија на Украина. во секое време. 5.000 шлемови се шега. Како Германија ќе продолжи да не поддржува? Можеби перници.