Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес – козињак.

– Постојат рецепти што не се читаат – тие се паметат. Се пренесуваат тивко, од рака на рака, од генерација на генерација, како најтопла семејна тајна. Козињакот е токму таков: мек, миризлив и раскошен, со златна кора и душа што раскажува приказни за празници, заедништво и љубов. Додека се пече, домот се исполнува со мирис на портокал и путер, а времето како да застанува барем за миг. Овој рецепт не е само упатство – тоа е покана да создадете спомен – порачува Бобе.

Состојки за тестото:

– 550 г брашно (просеано)
– 250 мл млеко
– 7 г сув квасец (или ½ коцка свеж)
– 70 г шеќер
– 70 мл сончогледово масло
– 30 г путер (на собна температура)
– 1 јајце
– 1 жолчка
– прстофат сол
– ½ лажичка махлеп
– рендана кора од 1 голем портокал
– 200 г суво грозје

За премачкување:

– 1 жолчка

Подготовка:

Од вкупната количина млеко и брашно одделете 50 мл млеко и 1 лажица брашно. Измешајте ги со квасецот, покријте и оставете околу 10 минути, додека смесата не стане пенлива и жива.

Во сад за месење просејте го остатокот од брашното. Додајте шеќер, сол и рендана кора од портокал. Потоа ставете ги активираниот квасец, путерот, јајцето и жолчката. Започнете со месење на ниска брзина, постепено додавајќи го преостанатото млеко и маслото.

Месете 10–15 минути, додека добиете мазно, сјајно и еластично тесто. Избегнувајте дополнително брашно освен ако навистина е потребно. На крај додајте го махлепот и месете уште кратко.

Покријте го тестото со фолија и оставете го на топло место да го удвои волуменот – најмалку 1 час.

Стасаното тесто префрлете го на работна површина и нежно развлечете го. Распоредете го сувото грозје рамномерно, завиткајте го како ролат, па поделете го на 12 еднакви топчиња. Наредете ги во намастен калап или тава.

Покријте со крпа и оставете повторно да стасаат околу 30 минути.

Загрејте ја рерната на 170 степени. Премачкајте ги со изматена жолчка и печете 20 минути. Потоа покријте со хартија за печење за да не потемнат премногу и печете уште 20-30 минути, додека не добијат убава златна боја.

Оставете ги печивата да одморат 10 минути, потоа покријте ги со памучна крпа и оставете целосно да се изладат. Така ќе ја задржат својата мекост и свежина.

На здравје – и нека секое парче ви донесе топлина, како од најубавите спомени.