Гастрономско уживање од вештите раце на Бобе Јанкоска: Бајадера деликатес
Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.
Бобе денеска споделува рецепт за вистински гурмански деликатес – бајадера деликатес.
– Замислете го вашиот прв залак од „Бајадера деликатес“ како патување низ вкусовите – најпрво ќе го почувствувате свиленкастиот вкус на темното чоколадо со кое е прекриена бајадерата, кој ќе се спои со интензивноста на белото и темното чоколадо со првиот загриз. Продолжете со уште еден залак и ќе ги истражите сите нијанси на ова вкусно ремек-дело, каде секој слој е откритие. Особено комбинацијата од мелените лешници и бисквити, што ќе ви донесат текстурно уживање кое завршува со магични вкусови и ароми – ја објаснува Бобе сета убавина и вкус на овој неодолив десерт.
Состојки:
– 140 грама путер
– 200 мл вода
– 240 грама шеќер
– 100 грама темно чоколадо
– 100 грама бело чоколадо
– 400 грама мелени лешници/бадеми (може и половина да се сечкани за да има структура)
– 400 грама мелени бисквити
– 200 грама темно чоколадо за прелив
Подготовка:
Бајадерата ја подготвувам во две тенџериња одеднаш, во едното белата смеса, а во другото чоколадната смеса:
Бела смеса: 70 грама путер, 100 мл вода и 120 грам шеќер да зоврие, се тргнува од оган, па се додава 100 грама бело чоколадо со мешање додека да се растопи чоколадото. Потоа се додаваат 200 грам мелени лешници/бадеми и 200 грама мелени бисквити.
Чоколадна смеса: 70 грама путер, 100 мл вода и 120 грама шеќер да зоврие, се намалува температурата, па се додава 100 грама темно чоколадо со мешање додека да се растопи чоколадото. Потоа се додаваат 200 грама мелени лешници/бадеми и 200 грама мелени бисквити.
Кога ќе се подготват двете смеси, во правоаголен калап или тава се става прво чоколадната смеса, па врз неа се става белата смеса и се става во фрижидер да се лади 2 часа. Изладената смеса се прелева со 200 грама темно чоколадо растопено на пареа. Се остава уште половина час да се здрви чоколадото, потоа се сечат форми по желба, а јас ги сечам правоаголни.
„Бајадера деликатес“ е вкусно кулинарско патување низ софистицирани вкусови и ароми.