Дијана Иваноска со својот талент за комбинација на вкусови нè носи на едно исклучително гастрономско патување. Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови. Своите рецепти почнала да ги споделува со своите следбеници и пријатели од почетокот на пандемијата.

– Го сакам секој дел од процесот, но најмногу уживам во фотографирањето на храната – ни открива Дијана.

Инвентивната Дијана денеска споделува рецепт за едно гастрономско уживање – чоколаден авокадо мус (веган).

– Поздрава верзија од класичниот мус, со прекрасни состојки, без рафиниран шеќер, а вкусот е фантастичен, чоколаден, со прекрасна кремаста текстура – порачува Дијана.

Состојки:

– 2 поголеми авокада (зрели)
– 40 грама чоколада или чоколаден чипс
– 25 грама какао
– 85 грама јаворов сируп или агаве
– 60 мл растително млеко
– 1 лажица ванила екстракт
– Прстофат сол

Подготви:

Растопете ја чоколадата во сад што е ставен над тенџерче со вода што врие. Водата не треба да го допира садот. На овој начин чоколадата нежно се топи и нема опасност од загорување. Може да ја растопите и во микробранова печка, ако ви е така полесно.

Авокадото извадете го од лушпа и отстранете му ги семките. За овој рецепт многу е важно авокадото да биде зрело за да се добие мазна и кремаста смеса.

Сите состојки ставете ги во процесор за храна или посилен блендер и мешајте додека не добиете хомогена, мазна смеса. Оставете го малку да се излади во фрижидер.

Мусот префрлете во чаши и уживајте.

Одозгора можете го декорирате по желба, со јатки, овошје, гранола. Превкусно е и само така, без ништо.