Претседателот на Украина Володимир Зеленски информираше дека бројот на жртви по нападот врз Киев кој се случи ноќеска, се искачил на 4 лица, а околу 100 луѓе се повредени низ целата земја. Само во Киев, околу 30 станбени згради се оштетени или уништени.

Благодарен сум на сите наши служби кои моментално работат на местата на ноќните напади од Русија: единици на Државната служба за вонредни ситуации, Националната полиција и општинските служби. Сите дејствуваат што е можно поефикасно, со оглед на обемот на нападот и неговите последици: околу 100 лица се повредени низ целата земја, а уште четири, трагично, се убиени. Моето сочувство до семејствата и најблиските. Само во Киев, околу 30 станбени згради се оштетени или уништени. Многу е важно нашите луѓе да се поддржуваат едни со други. Благодарен сум на секој човек кој им помага на погодените. Континуираната поддршка од нашите партнери не е помалку важна. Благодарен сум на сите кои сега изразуваат зборови на поддршка. Но, потребни се и конкретни чекори за зајакнување на воздушната одбрана – испораките на ракети не смеат да престанат ниту еден ден, напиша Зеленски.

Руските сили започнаа комбиниран напад со ракети и беспилотни летала во голем обем во текот на ноќта на 24 мај, насочен главно кон Киев и околниот регион, предизвикувајќи жртви и уништување низ целиот главен град.

Воздухопловните сили на Украина соопштија дека Русија лансирала 90 ракети и 600 беспилотни летала во напад што траел неколку часа, што го прави нападот еден од најголемите во последната година. Градоначалникот на Киев, Виталиј Кличко, вели дека има штета „во секој округ од градот“.

Националниот музеј на уметноста, еден од најстарите и најважните музеи во Украина, беше оштетен од бранот експплозии соопшти Министерството за култура на Украина. Колекцијата, која опфаќа од класична до современа уметност, не била оштетена.

Операта во Киев, Украинската куќа, стадионот „Динамо Валериј Лобановски“ и Музејот Чернобил беа меѓу другите институции оштетени во нападот.

Русија ја води својата војна не само против нашиот народ. Ја води против украинската култура, историја, сеќавање, индустрија и нормалниот начин на живот. Киев, епицентарот на рускиот напад вечерва, ќе се опорави. Репутацијата на Русија како терористичка држава нема. Мораме колективно да oсигураме дека врз Русија ќе се изврши доволен притисок заради мирот, напишаа од амбасадата на Украина во Македонија на Фејсбук.

ВИДЕО | Русија го нападна Киев со 600 дронови и со 90 ракети — Зеленски обвинува дека бил употребен „Орешник“