Канцеларискиот простор на фотографиите се наоѓа на приземјето на еден станбен објект во центарот на Скопје, изграден пред земјотресот во 1963 година. Поради претрпените оштетувања, поставени се структурни зајакнувања што го делат просторот во неколку зони.       

Од главната улица се пристапува во централниот отворен дел со целосно застаклен излог ориентиран кон исток, а задниот дел што е делумно затворен има посебен излез кон задниот двор.

Ваквиот распоред совршено одговори на потребите за просторна организација на работните процеси во Академик кои подразбираат индивидуална истражувачка работа, работа во тимови, организација на предавања и обуки, менаџирање на продажба.

Во работниот дел доминираат бели површини, во комбинација со неколку бои кои ги акцентираат просторни елементи. Одбран е канцелариски мебел со едноставен дизајн од колекцијата на Burotime, комбиниран со неколку парчиња изработени по мерка.

Постои можност работните станици да се комбинираат, во зависност од големината на работниот тим. Салата за состаноци и просторијата за предавања и обуки се изолирани од централниот дел.

Целта при уредувањето на канцелариите беше да се нагласат затекнатите квалитети на внатрешниот простор – волуменот, големата висина на плафоните, интензитетот на природната светлина. Употребата на боја е строго концентрирана само на еден ѕид, и на неколку парчиња мебел поставени во просторот.

ЗА ПОВЕЌЕ ИНФОРМАЦИИ, КЛИКНЕТЕ ТУКА