ГАЛЕРИЈА | Боемски шик во стан во Козле: Како изгледа кујната од вашите соништа?
Изведбата на проектот е од скопското архитектонско студио „Студио 90“
Современата кујна тешко е да се замисли како изолирана соба во рамките на станот или куќата. Според сите најнови трендови, кујната е отворена и споена со просторот за дневен престој и трпезаријата.
Кујната како центар на сите случувања во домот
Универзумот на двајца млади во Скопје е реализиран во eclectic-boho стил, инспириран од широк спектар на извори, со повеќеслојни преклопувања на различни материјали, бои и дезени.
Елементите во кујната се изработени од дрво – орев во природна, темна нијанса, во комбинација со метални црни полици каде се распоредени омилените предмети на корисниците.
Сјајните рустични плочки во зелена боја и карактеристични шари се уникатен акцент во просторот.
Кујнскиот остров исто така е изработен од масивно дрво – орев, а просторот под и над островот е искористен за одлагање на приборот што секојдневно се користи при подготовка и консумирање на храна.
Смелост во изборот на текстури и материјали
Суштината на боемскиот шик е едноставна: земете ги сите ваши омилени предмети – иако се различни по боја, форма и текстура, и уживајте во нивното комбинирање за да создадете уникатен ентериер.
Во овој ентериер постојат повеќе акценти со нагласување на зелената боја во различни елементи. Осветлувањето е поставено со цел да ги нагласи местата со различни бои и текстури.
Рамнотежата во просторот е постигната со селектирање на парчињата мебел и нивно внимателно распоредување.