Футсалците бркаат СП, против Словенија за второто место
Македонската А футсал репрезентација в четврток ќе ги започне натпреварите од главната рунда во квалификациите за пласман на Светското првенство во 2020. година.
Нашата селекција на стартот ќе игра против Словенија во 17:30 во спортскиот центар „Јане Сандански“ – Скопје, а до крајот на турнирот во организација на Фудбалската федерација на Македонија ќе се соочиме со Косово (петок, 17:30 часот) и против Украина (недела, 17:30 часот).
Селекторот на македонската А футсал репрезентација, Иван Божовиќ се соочува со проблеми поради повреди на влијателните играчи Даниел Де Соуса и Драган Петровиќ, но вели дека нема да се откажеме од борба за втората позиција во групата.
– За натпреварите од турнирот дефинитивно нема да сметаме на Даниел Де Соуса и Драган Петровиќ поради повреди, а тоа е сериозен удар за шансите на македонската репрезентација силно да се спротивставиме на репрезентациите во групата, посебно на словенечката селекција и да се бориме за второто место. Украина е топ фаворит за првата позиција и би било сензација доколку не го потврдат тој статус. Во вакви околности, без повредените Даниел и Петровиќ и со недоволно залечените Исмаили и Рамадан, Словенија е фаворит, но тоа не значи дека ќе се предадеме однапред. Сите што ќе настапат знаат дека мораат да дадат и повеќе од своите можности за да оствариме позитивен резултат. Со играчите кои ги имаме на располагање се подготвуваме максимално и на терен ќе излеземе да дадеме сѐ од себе и се надеваме на резултатски добро отворање на турнирот – рече селекторот на футсал репрезентацијата, Иван Божовиќ.
Првопласираните две репрезентации од групата ќе обезбедат настап во завршната трета елитна рунда како последна пречка на патот кон Мундијалот.