Кошаркарската репрезентација на Франција е првиот четвртфиналист на Европското првенство откако во крајно неизвесен натпревар со 87:86 ја победи Турција. Противник на Франција во четвртфиналето ќе биде подобриот од дуелот меѓу Србија и Италија кои ќе играат утре.

„Триколорите“ со серија од 7:0 го започнаа натпреварот и веднаш наметнаа ритам кој мораше да следат Турците. Французите без проблеми ја одржуваа предноста и кон средината на втората четвртина поведоа и со 15 поени разлика (31:16).

Но, на неколку минути пред одморот, Турците почнаа да се будат и успеаја првото полувреме да го завршат со едноцифрена негатива (43:35). Франција на стартот од третата четвртина поведе со 48:39, а потоа до крајот на овој дел од играта, Турција направи неверојатна серија од 0:19 за видстви од 49:57.

Франција го отвори последниот дел со серија од 7:0 и се врати во живот, а по поените на Мбаје дојде до минус еден 56:57. Турците одговорија со пет поени по ред за 63:59.

Франција постигна поени преку Ертелм а потоа со тројката на Луваву дојде до израмнување на 66:66 на пет минути до крајот. Потоа следеше период во кој се играше поен за поен и во последната минута од натпреварот Франција влезе со предност од 73:72.

Во следниот напад Коркмаз изнуди прекршок при шутот за три поени по што ги реализира сите слободни фрлања. На 25 секунди до крајот Фурние стапна на линихата и топката ја добија Турците преку Коркмаз погодија за 77:73. Французите одговорија до два поени но и со неспортска лична грешка на 11,8 секунди до крајот.

Овој пат Турците не ги реализираа слободните фрлања, по што Руди Гобер на две секунди до крајот ја заби топката за израмнување и продолжение од пет минути.

Во продолжението Франција беше подобра и отвори со 4:0, но Турција не се предаде и по тројката на Коркмаз намали на 83:82. На 90 секунди беше досудена неспортска лична грешка врз Гобер кој беше сигурен од линијата за слободни фрлања за 87:82. Но, ниту тоа не беше крајот, Франција промаши еден напад, направи прекршок, а Турција дојде на еден поен негатива на 39 секунди до крајот.

На другата страна Гобер ги промаши двете слободни фрлања, Турција имаше напад за победа, но на 5 секунди до крајот Коркмаз ја загуби топката и ја испрати Франција во четвртфиналето.

Руди Гобер постигна 20 поени со 17 скока за Франција, Томас Ертел и Еван Фуриние дадоа по 13 поени, додека на другата страна Бурган Тангер постигна 22 поени, Фуркан Коркмаз 18, а Сертач Санли 12 поени.