ФОТО+ВИДЕО | Шакира за разделбата со Пике: Ова е најмрачниот период од мојот живот
Поп-пејачката Шакира е вистинска музичка икона кога станува збор за латино музиката. Еден од најзначајните моменти за нејзината музичка кариера е кога нејзината песна „Waka Waka“ беше прифатена за официјална песна на Светското првенство во фудбал во 2010 година. Но, тоа ѝ донесе среќа и на љубовен план – тогаш го запозна шпанскиот фудбалер Жерар Пике.
„Имав изгубено верба во тој период… Почнав да мислам дека нема Господ. И, одеднаш, го запознав Жерар и ми се чинеше ко ме огреа сонце“, раскажа убавата Колумбијка за „Ел“ во 2013 година.
Неколку години подоцна, нештата се многу поинакви за пејачката. Во своето најново интервју за „Ел“, таа вели дека ова ѝ е „најмрачниот период досега“.
„Многу ми е тешко да зборувам на оваа тема, особено бидејќи ова ми е првпат да зборувам за ситуацијата во некое интервју. Останав тивка и се обидов да испроцесирам сѐ. Да, тешко ми е да зборувам, особено поради тоа што сè уште поминувам низ тоа и поради тоа што сум јавна личност, па затоа нашата разделба не е вообичаена разделба.“
„Беше навистина тешко, не само за мене, туку и за моите деца. Неверојатно тешко. Постојано имам папараци пред мојот дом. Освен кога остануваме дома, јас и моите деца немаме место каде што можеме да се сокриеме. Знаете, ние не можеме да прошетаме во парк како секое нормално семејство, или да одиме на сладолед, бидејќи папараците постојано нѐ следат.“
„Се обидов да ја сокријам ситуацијата пред моите деца. Се обидувам да го направам тоа и да ги заштитам – тоа е мојата најважна мисија во животот. Но, тие ги дознаваат работите од нивните пријатели на училиште или ги читаат непријатните вести на интернет. Едноставно, тоа им влијае“, раскажа Шакира за „Ел“.
„Понекогаш чувствувам како ова да е само лош сон и дека во еден момент ќе се разбудам. Ама не, ова е реално. Реална е разочараноста што гледам нешто толку свето и специјално, како што мислев дека е врската која ја имав со таткото на моите деца, се претвора во нешто вулгаризирано од медиумите. И сето тоа додека татко ми е на интензивна нега и јас се борам на различни фронтови. Како што реков, ова е најмрачниот период од мојот живот“, раскажа Шакира за „Ел“.
Како потсетување, Шакира и Пике беа заедно од 2011 година и имаат две деца – деветгодишниот Милан и седумгодишниот Саша.
Веста за нивното разделување ја споделија во јуни годинава, со официјално соопштение објавено од нејзината агенција.
„За жал, потврдуваме дека нашите патишта се разделуваат. За доброто на нашите деца, кои се наш најголем приоритет, бараме да ја почитувате нашата приватност“, стоеше во нивното соопштение.