Под мотото „Апсолутна власт, апсолутна забава“, синоќа се одржа 29. издание на најпопуларната манифестација на домашната сцена – „Златна бубамара на популарноста“ во преполната сала „Борис Трајковски“

Вечерта беше во знак на легендите, врвните музички изведби и признанијата за оние кои оставија траен белег на македонската сцена. Легендарниот Круме Спасовски ја доби наградата за животно дело, а публиката ја поздрави неговата вонвременска изведба на хитот „Чудна жена беше вера“. ​

Наградата за трајни вредности оваа година ја доби актерката и театарска режисерка Снежана Конеска-Руси, за која беше речено дека нејзиниот глас и лик се „синоним за професионализам и уметничка посветеност со децении наназад“.

Во музичкиот дел, регионалните легенди „Црвена јабука“ беа наградени за нивниот повеќедецениски придонес во музиката на овие простори. ​

Владимир Четкар со својот препознатлив звук внесе џез-фанк елеганција, додека младата и талентирана Тина Русева, победничката на германското издание на натпреварот „Гласот на Европа“, воодушеви со моќната интерпретација на „Не допирај ме“.

​За најпопуларна пејачка во регионот беше прогласена Александра Радовиќ, која уште еднаш ја потврди својата силна врска со македонската публика.

Посебно признание доби и маестро Дамир Имери, чијшто музички гениј и виртуозност на сцената ги пофали нашиот најдобар гитарист на сите времиња, Влатко Стефановски. ​

Дека театарската сцена останува во сигурни раце потврдија наградите кои ги добија младите актери Нина Елзесер и Тони Денковски.

На сцената се појави и американската соул-ѕвезда Марта Хај, на која ѝ беше врачена „Златна бубамара“ за животно дело.

Забавата и хуморот, кои се заштитен знак на оваа манифестација, како и секоја година беа на високо ниво благодарение на дуото актери-водители Атанас и Тино, кои во нивен стил ја одржуваа атмосферата во салата, коментирајќи ги актуелните политички и општествени настани во Македонија.