Вработените во Општина Центар минатиот викенд биле во Крушево каде, како што вели градоначалникот Горан Герасимовски, реализирале продуктивен работен викенд во Крушево, посветен на „Стратешко планирање со индивидуално акциско планирање“.

Имавме интерактивни сесии и практични вежби за унапредување на стратешките вештини и дефинирање конкретни и јасни временски рамки, со цел да бидеме поефикасни поорганизирани и поуспешни во работата – тврди градоначалникот, објаснувајќи ја во јавноста посетата на Крушево.

Освен што работеле, вработените имале и тим билдинг активности, како на пример посета на Македониумот, односно споменикот „Илинден“ , искачување во Адреналинскиот парк и слично, кои според Герасимовски придонеле за зајакнување на тимскиот дух, подобра комуникација и поголема меѓусебна доверба.

Оваа иницијатива е уште еден чекор кон градење модерна, професионална и ефикасна администрација во служба на граѓаните – напиша Герасимовски на Фејсбук.

Колку ова работење и јакнење на тимскиот дух на вработените од Општината ги чини граѓаните од Центар, градоначалникот не соопшти.