Вегански активисти одржаа симболичен протест во центарот на Атина, противејќи се на убивањето јагниња во пресрет на Велигден. Членови на Панхеленската федерација „Немезис“ се собраа на плоштадот Синтагма, носејќи транспаренти со пораки како „Колењето не е љубов“ и „Време е да ги гледаме животните како поединци“, пренесува српски „Еуро њуз“.

Според официјалното соопштение на федерацијата, акцијата немала карактер на „перформанс“, туку претставувала протест против колењето на стотици илјади животни во име на традицијата.

„Тоа беше тивок крик против колењето на стотици илјади животни во име на традицијата. Сакавме да потсетиме дека Велигден, како и секој празник, не мора да се базира на болка и крв. Јагнињата и козите – мали животни од 4 до 5 недели – масовно се колат, со религиозно оправдување и општествено прифаќање“, се наведува во нивното соопштение, со прашањето: „Може ли љубовта да се темели на смрт?“.

Грција го слави Велигден според јулијанскиот календар, кој оваа година се одбележува на 12 април.

Протестот се одржа во центарот на Атина, привлекувајќи внимание од минувачите кои се наоѓаа на неделна прошетка.

Активистите нагласуваат дека нивната цел е да се подигне свеста за правата на животните и да се промени начинот на кој општеството ги гледа.

„Дојдовме тука за да протестираеме. Ние сме вегански активисти и сме против велигденските колења. Над два милиони бебиња – јагниња и јариња – се колат за оваа традиција. Тука сме за светот да разбере дека оваа традиција повеќе не треба да постои, затоа што има жртви. Животните имаат право на живот и на автономија, исто како и луѓето“, истакна една активистка.

Таа додаде дека животните чувствуваат болка и емоции, имаат семејства, а разделбата меѓу мајки и младенчиња е тешка и за нив.

„Исто како што мајката го сака своето дете, така и козата ја сака својата коза. Зошто сакаме да им го одземеме тоа и да ги колеме?“, праша таа.

Протестот заврши со повик до граѓаните да ги преиспитаат своите навики за време на празниците и да размислат за Велигден „без крв и болка“.