Злата Петковиќ важеше за една од најубавите жени на поранешна Југославија. Својата глумечка кариера ја започна уште пред да се запише на факултет, во филмот на Милан Јелиќ „Бубашинтер“. Следната година, 1971, беше прогласена за Мис на Југославија, на само 17 години. Истата година, во Токио, ја доби титулата Мис фотогеничност, пишува „Стил“.

Иако имаше титули и убавина, таа реши да се посвети на глумата и се запиша на Факултетот за драмски уметности во класа со Богдан Диклиќ, Љиљана Стјепановиќ, Снежана Савиќ, Лазар Ристовски…

Петковиќ стана мајка на 19 години, кога го роди синот Гвозден. Како што раскажала, за време на студиите ја криела бременоста, сè додека една професорка не забележала дека ѝ се заоблил стомакот.

„Се плашев дека ќе ме избркаат од класата, па шест месеци ја криев бременоста. Одев на сите предавања и вежби. Се сеќавам дека во шестиот месец полагав колоквиум по акробатика, во трико. Тогаш професорката Огњенка забележа дека сум се здебелила и сфати за што станува збор. Бев одлично подготвена и добив највисока оцена“, изјавила таа.

Гвозден го добила со момчето кое ѝ било љубов од факултет, и покрај противењето на родителите за млада венчавка, таа го следела срцето. Со таткото на Гвозден била во брак 10 години.

Подоцна се омажила за музичарот Александар Сања Илиќ, со кого го добила синот Андреј. Со Сања останала во брак до крајот на својот живот.

Има остварено многу успешни улоги, а публиката ја памети како Марија во „Отписани“ и Лепа во „Грлом у јагоде“.

„Аца Ѓорѓевиќ ме повика да играм во филмот, а потоа и во серијата ‘Отписани’. Ми рече дека ме чека огромна популарност, што тогаш не го сфатив сериозно. Снимавме една година, по една епизода месечно, како филм. Тоа беше феноменално искуство бидејќи на почетокот на кариерата работев со големи актери. Долго потоа луѓето ме поврзуваа со ликот на Марија Симеуновиќ, каде и да одев, бев прифатена со воодушевување. Но, таа улога беше меч со две острици – подолго време потоа никој не ме викаше да снимам ново. Режисерите се плашеа дека публиката сè уште ќе ме гледа како Марија“, изјавила еднаш актерката.

Таа исто така истакнала дека одбивала улоги.

„Сфатив дека ме има премногу, што може да биде контрапродуктивно. Дојде до заситеност, но и до пад на квалитетот на филмовите и сериите. Одбивав многу улоги и како што бев во позиција да бирам, никогаш не влегував во нешто зад кое не можев да стојам. Се посветив на театарот и патувачки трупи. Работев колку што ми одговараше. Чудно ми е кога ме прашуваат зошто ме нема – ако не сте на телевизија, како да не постоите. А јас сум многу јасна во моите желби и приоритети. Никогаш не сум бркала слава и не сум била под притисок. Работев само она што го сакав“, раскажала за „Блиц“.

Сопругот Санја Илиќ еднаш изјавил: „Кај актерите е проблем што сите ги паметат по една улога. Мојата Злата не сакаше да биде само Марија од ‘Отпишани’. Таа водеше повеќе грижа за нас отколку за својата кариера. Кога ја прашав зошто, ми рече: ‘Најважни ми се децата, мажот и домот’. Не сакаше да се разголува на филм, имаше визија и никој не можеше да ја одврати“.

Злата почина во 2012 година по мозочен удар. Долго време се борела со висок притисок, а нејзиниот сопруг бил со неа до последниот момент.

„За љубовта со Злата виновна е една детска приредба. Љубовта траеше 30 години. Замина како што замина… Не стигнав ни да ѝ кажам колку ја сакам. Само падна и ја однесоа во болница. Ја држеа во вештачка кома, но немаше спас“, рекол Сања во едно интервју.

Нивната љубов траела три децении, а плод на таа љубов е синот Андреј, еден од сопствениците на продукцијата „Ај-ди-џеј“.

„По смртта на Злата решив да продолжам понатаму. Требаше и нашиот син Андреј да го изведам на вистински пат. Поддршката ја давав преку контрола, не со наметнување. Имам два лузни на срцето – изгубив пријател, Петар Јовичиќ Трта, пејач во бендот ‘Сан’, и по многу години ја изгубив и сопругата Злата“, раскажал Сања.

Сања Илиќ почина на 7 март 2021 година од последици од ковид-19.