Водителката и музичарка Сузана Турунџиева се огласи со исклучително емотивна порака по повод годишнината од смртта на нејзиниот сопруг Марјан. Таа преку социјалните мрежи сподели фотографии и се потсети на него, истакнувајќи дека празнината што ја оставил зад себе не се полни, но спомените и љубовта остануваат вечни.

„Ова утро се навршуваат 10 години без тебе Марјане, во кои твоето отсуство го чувствуваме секој ден … Времето лета, децата пораснаа, добивме и внуци, но љубовта, спомените и трагата што ја остави во нашите срца, остана засекогаш . Многу ни недостасува твојата насмевка, хумор, твоите зборови и топлината што ни ја даваше. Болката со годините се менува, но никогаш не исчезнува. Научивме да живееме со празнината, но никогаш да не престанеме да те сакаме и да те спомнуваме. Ти благодариме за секој момент кој го споделивме, за секоја лекција и за љубовта што ни ја подари … Твојата љубов е наша сила.“

Во интервју за „Слободен печат“, осврнувајќи се на тешките периоди, предизвиците и изминатите години од нејзиниот живот, Сузана Турунџиева зборуваше за нејзината сила и борбеност.

„Ако го вратам наназад мојот живот уште малку порано, всушност ќе кажам дека НИКОГАШ НИШТО НЕ БЕШЕ ЛЕСНО И ЕДНОСТАВНО во мојот живот, како некој да ми го притиснал „копчето“ на најтешкото! Судбината често пати ми поделила „лоши карти“, но, јас научив и со тие лоши карти да одиграм разумно, добро, некогаш дури и многу добро! Така што, му благодарам на Бога за сите искушенија, предизвици и солзи кои ми ги даде, во спротивно не ќе бев ни свесна колкава ми е силата и способноста да издржам и да се исправам на нозе и после сите понори“.