Откако официјално заврши тридневната „чистка“ на Скопје која новиот градоначалник Орце Ѓорѓиевски ја најави во својата кампања, екипи на едно од градските претпријатија и денеска продолжија со чистењето на градскиот центар, поточно на плочникот под Камени мост.

Ѓорѓиевски во саботата вечер информираше дека е задоволен од 72-часовната „генералка“ на градот и дека службите ќе продолжат со расчистување на преостанатите мини-депонии низ Скопје, а истакна дека при оваа акција биле собрани 4.500 тони отпад.

Првите 72 часа на Ѓорѓиевски – чисто Скопје и 4.500 тони помалку отпад

– Плоштадот „Македонија“ е исчистен, кејот беше целосно третиран, исто како и Градскиот парк, Жена парк и сите останати места кои во минатото беа симбол на срам за градот. Нема да дозволам повторно да ја гледаме грдата слика на валкано Скопје – изјави Ѓорѓиевски вечерва на плоштадот по завршувањето на акцијата.

Ѓорѓиевски информираше дека во изминатите денови биле изречени над 40 казни и 70 опомени за физички и за правни лица и најави дека контролите ќе продолжат, а сите оние кои несоодветно ќе го одложуваат отпадот ќе се соочат со санкции.