Жена од Етиопија, која со години се борела со неплодност, по 12 години конечно стана мајка, и тоа на пет деца зачнати по природен пат, пренесува „Би-би-си“.

Триесет и петгодишната Бедрија Адем изјавила дека таа и нејзиниот сопруг се „пресреќни“ што одеднаш добиле пет деца — четири момчиња и едно девојче.

„Не можам со зборови да ја опишам својата среќа“, рекла таа за ‘Би-би-си’, потсетувајќи дека со години живеела во тага и болка додека не ѝ се исполниле молитвите.

Директорот на болницата „Хивот Фана“, доктор Мохамед Нур Абдулахи, изјавил дека мајката и бебињата и понатаму се под медицински надзор.

Бебињата при раѓањето тежеле меѓу 1,3 и 1,4 килограми, а лекарите велат дека новороденчињата со повеќе од еден килограм имаат добри шанси за преживување и здрав развој.

Според докторот, Бедрија забременила по природен пат, без вештачко оплодување, а веројатноста за ваков случај е околу еден наспроти 55 милиони.

Породувањето било извршено со царски рез во вторникот вечерта.

„Во текот на бременоста редовно добиваше медицинска грижа и ѝ беше кажано дека носи повеќе од едно бебе. Во целиот период имаше соодветна лекарска помош“, изјавил докторот, опишувајќи ја нејзината огромна возбуда.

Бедрија раскажала дека првично ѝ било кажано дека носи четири бебиња, но при породувањето се појавило уште едно.

„Се молев само за едно дете, а Алах ми даде пет“, рекла таа, зборувајќи за своето долго и тешко чекање.

Новопечената мајка, која првпат се породила, открила дека нејзиниот сопруг веќе има едно дете од претходен брак, кое живее со нив.

„Ми велеше дека ни е доволно тоа дете и дека не треба да се грижам, но длабоко во себе страдав — психички и емоционално — затоа што целото село ја преиспитуваше мојата неможност да родам“, изјавила таа.

„Сето тоа низ што поминав сега ми изгледа како далечен сон, нешто на кое веќе не сакам ни да се сеќавам. Поминав 12 години во болка, криејќи се и постојано молејќи се за деца — конечно Алах ме послуша“, додала Бедрија.

Таа објаснила дека се занимава со земјоделство за сопствени потреби и дека не знае како ќе успее да го издржува толку големото семејство.

„Но верувам дека Алах ќе испрати помош преку мојата заедница и државата“, рекла таа.

Нивните „пет бебиња“ ги добиле имињата Наиф, Амар, Мунзир, Назира и Ансар.