Постојат места на Јадранот кои ве освојуваат на прв поглед, а едно од нив без сомнение е плажата Сакарун, која се наоѓа на Долгиот остров, во задровскиот архипелаг во Хрватска. Нејзината речиси нереална комбинација од тиркизно море, светол песок и мирисна боровa шума е причината зошто многумина без размислување ја споредуваат со егзотични дестинации како Карибите. Но она што е особено фасцинантно е фактот дека овој пејзаж не се наоѓа на другиот крај на светот, туку на хрватскиот брег, пишува „Путникофер“.

Плажата Сакарун е долга околу 300 метри и е позната по исклучително плиткото море кое се протега далеку од брегот. Токму затоа е идеална за семејства со деца, но и за сите кои сакаат безгрижно да уживаат во топлото „плитко“. Морето тука е речиси секогаш мирно, а боите се прелеваат од светлосина до длабока тиркизна нијанса.

Место каде природата го диктира темпото

Она што дополнително го засилува впечатокот за оваа плажа е нејзиниот природен амбиент. Таа е опкружена со прекрасни борови кои обезбедуваат сенка во топлите летни денови. Звукот на штурците, лесниот ветер и погледот кон отворено море создаваат атмосфера на целосна релаксација, поради која многумина остануваат со часови или се враќаат од година во година.

Нејзината убавина ја препознале и светските медиуми, па често се наоѓа на листи на најубави плажи во Европа и светот. На пример, „Форбс“ ја вклучи на листата на десет најубави плажи во светот, а во својот текст посебно го истакна кристално чистото море и недопрената природа што ја прават едно од најпосебните места на Јадранот.

Остров кој крие многу повеќе од една совршена плажа

Иако Сакарун за многумина е првата причина за посета, Долгиот остров нуди многу повеќе од една спектакуларна плажа. Станува збор за еден од најпосебните острови на задровскиот архипелаг, познат по својата дива природа, автентични места и опуштена атмосфера која тешко се наоѓа на попопуларните дестинации.

Една од најимпресивните природни атракции е секако Паркот на природата Телашќица, област која одзема здив со своите стрмни карпи кои драматично се издигаат над морето. Овие карпи, меѓу највисоките на Јадранот, често се мотив на фотографии кои го обиколуваат светот, а погледот од нивниот раб остава без зборови.

Од автентични села до камено чудо на Медитеранот

Долгиот остров не е дестинација за оние кои бараат бурен ноќен живот, туку за патници кои сакаат да забават и да уживаат во едноставните работи. Мали места како Сали зрачат со автентичен далматински шарм, а во лето оживуваат преку традиционални манифестации и настани како познатите „Саљски ужанци“.