Аромите на ореви, ванила и чоколадо некогаш го обележувале секој празничен настан. Во време кога рецептите внимателно се запишувале во тетратки и се пренесувале од генерација на генерација, се создавале колачи кои и денес се синоним за домашна кујна. Ве враќаме во времето кога колачите од тетратката на вашата баба ја краселе секоја трпеза, можеби и вие самите сте пораснале со некои од тие деликатеси.

Ви донесуваме три старински рецепти што ги краселе трпезите низ цела поранешна Југославија, особено за време на големите празници како што е Велигден. Цела Југославија мирисала на овие вкусни десерти. Секоја домаќинка во Југославија знаела да ги подготви, а децата не можеле да им одолеат.

Кох
Состојки:

– 5 јајца
– 13 лажици шеќер
– 10 лажици гриз – 1 литар млеко
– 2 ќесички ванилин шеќер

Подготовка:

Одделете ги белките од жолчките, а потоа изматете ги белките во цврст снег. Во белките додајте 10 лажици шеќер, па матете уште малку. Потоа додајте го жолчките и гризот полека мешајќи со миксер на најмала брзина. Подмачкајте го плехот, па посипете го гризот, па сипете ја смесата и печете на 200 степени 20 минути. Кохот е печен кога ќе порумени и ќе почне да се одвојува од рабовите на плехот.

Додека се пече кохот, сварете го млекото со 3 лажици шеќер и ванилин шеќер. Ако сакате кохот да биде посочен, користете литар ипол млеко и додајте уште 3 лажици шеќер. Испечениот кох, со кутлача преливајте го со топло млеко (никако не сипете сè одеднаш). Послужете кога ќе се излади и кога ќе го впие целото млеко.

Шненокли
Состојки:

– 4 јајца (да се одвојат жолчката и белката)
– 100 грама шеќер
– околу 2 литри млеко
– 1,5 лажици брашно (или густин)
– 1 лажичка екстракт од ванила
– 2 ќесички ванилин шеќер

Подготовка:

Со миксер изматете ги белките во цврста смеса. Сипете го млекото во длабоко тенџере, додајте го екстрактот од ванила и оставете да зоврие. Кога млекото ќе зоврие, намалете ја температурата, па со лажица вадете ги изматените белки и внимателно спуштете ги во врелото млеко. Шненоклите варете ги по 1,5 минута од секоја страна, па извадете ги од млекото и наредете ги во сад.

Крем за шненокли

Изматете ги жолчките и шеќерот, па во таа смеса додајте густин и брашно и 2 лажици млеко во кое се вареле шненоклите и сè убаво измешајте. Млекото во кое се вареле шненоклите ставете го повторно да врие, а температурата намалете ја. Полека додавајте ја смесата со жолчките со постојано мешање и сè заедно варете до згуснување.

Кога смесата ќе згусне, тргнете ја од шпоретот и оставете малку да се излади. Кога преливот ќе се излади, прелијте го врз шненоклите.

Чувајте го колачот во фрижидер.

Слатки кнедли со сливи (гомбоци)
Состојки:

– 500 грама компири
– 50 грама пченичен гриз
– 100 грама полубело пченично брашно
– малку сол
– 1 прашок за печиво
– 1 јајце
– сливи
– 2 лажици масло
– 12-14 големи лажици презла
– 6-8 лажици шеќер

Подготовка:

Сварете ги компирите. Изладете ги, излупете ги и ставете ги во длабок сад, па испасирајте ги со вилушка. Додадете ги гризот, брашното, прашокот за пециво, јајцето и солта. Со раце замесете го тестото да биде меко, а ако има потреба додадете уште малку брашно. со раката преваете топчиња, сплескајте ги и во средината на секое ставете цела слива, па затворете го топчето.

Во длабок сад сатавете вода да зовие. Во зовриена вода ставајте ги кнедлите и варете десетина минути, или додека кнедлите не почнат да лебдат на површината. Кога ќе излезат на површина, варете ги уште 2-3 минути.

Загрејте го маслото во тава, додајте ја презлата и запржете ја. Кога ќе поцрвени, тргнете ја смесата на страна, додајте го шеќерот и убаво измешајте. Во оваа смеса извалкајте ги кнедлите, па послужете ги.