Едно куче од Франција би можело да стане најстарото куче во историјата, откако организацијата Друштво за заштита на животните (СПА) стапи во контакт со Гинисовата книга на рекорди за официјално признавање, пишува „Телеграф“.

Станува збор за континентален минијатурен шпаниел по име Лазар, за кој се верува дека е роден на 4 декември 1995 година, што значи дека моментално е во својата 31-ва година.

Иако се соочува со бројни здравствени проблеми – артритис, намален слух и вид, како и проблем со јазикот кој постојано му виси од устата – Лазар и понатаму е жив доказ за неверојатна издржливост.

Досегашниот рекорд го држи кучето Блу, австралиски говедарски пес кој живеел 29 години и починал во 1939 година.

Лазар неодамна бил вдомен откако претходниот сопственик починал. Тој извесен период престојувал во засолниште во француските Алпи, каде што бил згрижен додека не добил нов дом.

Од засолништето велат дека возраста е внимателно проверена преку микрочип и официјалниот француски регистар за педигре кучиња.

„Направивме двојна проверка. Нема сомнеж – Лазаре е во својата 31-ва година“, изјави раководителката на засолништето.

Новата сопственичка, Офели Будол, вели дека за неа рекордот не е важен.

„Не ме интересира рекордот. Го вдомив затоа што ги сакам животните и веднаш почувствував врска со него. Не можев да дозволам животот да го заврши во засолниште – му требаше дом исполнет со љубов“, изјави таа за француските медиуми.

Доколку неговата возраст биде официјално потврдена, Лазаре би можел да стане најстарото куче досега регистрирано во светот.